لە ئەندەنوسیا دوای تەقینەوەی گڕکانی لیوتۆبی بەرپرسانی باڵا هۆشدارییان دا.

گڕکانی لیوتۆبی لە پارێزگای نۆسا تێنگارای ڕۆژهەڵاتی ئەندەنوسیا جارێکی دیکە تەقیەوە و تا ٥ کیلۆمەتر خۆڵەمێشی ڕشتەوە.

سەنتەری گڕکان و کەمکردنەوەی کارەساتی جیۆلۆجی ئەندەنۆسیا رایگەیاندووە، بەرزترین ئاستی ئاگاداری لە فڕۆکەوانیدا دراوە.

لە تەقینەوەکەدا کە کاتژمێر ١٠.٤٨ بەکاتی ناوخۆ روویدا، خۆڵەمێشەکە بەرەو ڕۆژئاوا و باشووری ڕۆژئاوا و باکووری گڕکانە بڵاوبووەتەوە.

چوونەوە بۆ دەوروبەری گڕکانەکە قەدەغە کرا و هەروەها داوا لە فڕۆکەکان کرا کە ئامادەکاری بۆ هەوری خۆڵەمێش بکەن کە دەتوانێت گەشتەکان پەک بخات.

درەنگانی شەوی یەکشەممە گڕکانی لیوتۆبی تەقیەوە و بەهۆیەوە ١٠ کەس گیانیان لەدەست دا و ٦٣ کەسیش برینداربوون و ٤ هەزار دانیشتووی دیکەش ئاوارەبوون. هەوری گەرم و کەرەستەی گڕکانەکە سەدان خانوو و باڵەخانەیان وێران کرد و ئاگر لە ناوچەکە کەوتەوە.

لیوتۆبی کە بەرزییەکەی ١٥٨٤ مەترە، یەکێکە لە ١٢٧ گڕکانە چالاکەکانی ئەندەنوسیا. ئەم وڵاتە بە درێژایی ئەڵقەی ئاگری زەریای هێمن هەڵکەوتووە و زۆرجار چالاکیی گڕکانەکان بەخۆیەوە دەبینێت.(İLKHA)